शनिबार २४ मंसिर २०७९

प्रत्येक तीजमा झस्काउने बागलुङको एउटा विभत्स हत्या तीजपछि सेलाउँछ।

तीज मनाएर फर्किएकी एक महिलाको दिउँसै मुख्य सडकमा हत्या भएको आठ वर्ष पूरा भएको छ। हत्यारा पत्ता नलाग्दा प्रत्येक तीजमा बागलुङका बासिन्दालाई रूपा गौतम हत्याकाण्डले झस्काइरहन्छ। हत्याका विषयमा तीजका समयमा कुरा उठ्ने गरे पनि तीजसँगै हत्याकाण्ड बिर्संदै गएको छ।

हरितालिका तीजको अघिल्लो दिन माइत गएर फर्कने क्रममा रूपाको दिउँसै सडकमा आठ वर्षअघि हत्या गरिएको थियो। काठेखोला गाउँपालिका–६ दोबिल्लाकी ३६ वर्षीया रूपाको हत्या भएको यो तीजसँगै आठ वर्ष पूरा भएको छ।

दिउँसै सदरमुकाम नजिकको बीच सडकमा हत्या गर्ने हत्यारा पत्ता नलाग्दा बागलुङका नारीलाई तीजमा माइत जाँदा झस्काउनेसमेत गरेको छ।

तीन वर्षअघि जिल्ला प्रहरी कार्यालयले अनुसन्धानबाट हत्याराको नजिकै पुगेको दाबीसमेत गर्न भ्याएको थियो। अहिलेसम्म हत्यारा पत्ता नलाग्दा प्रहरीलाई नागरिकस्तरबाट हत्यारा कहिले पत्ता लाग्छ भनेर प्रश्न उठ्न छाडेको छैन। जिल्ला प्रहरी कार्यालयमा सरूवा भएर आएका हरेक प्रहरी प्रमुखले हत्यारा पत्ता लगाउन प्रयास गरिरहेको बताउने गरे पनि आठ वर्ष बित्दासमेत हत्यारा पत्ता लाग्न सकेको छैन।

जिल्ला प्रहरी कार्यालयका प्रहरी प्रमुख प्रहरी उपरीक्षक दयानिधि ज्ञवालीले आफू जिल्लामा आइसकेपछि रूपा हत्याका विषयमा सूक्ष्म अध्ययन तथा अनुसन्धान गरिरहेको बताए।

‘रूपाजस्तै कर्तव्य ज्यानसँग जोडिएको तीन वटा विषयमा अनुसन्धान सफल भइसकेको छ, अहिले पुराना मुद्दालाई फछ्र्यौट गर्नेक्रम जारी छ, प्रहरी नायब उपरीक्षकको संयोजनमा अध्ययन गर्न लगाएको छु’, प्रहरी उपरीक्षक ज्ञवालीले भने, ‘अनुसन्धान जारी नै छ हत्यारा पत्ता नलाग्दासम्म यहाँ पुग्यौं, त्यहाँ पुग्यो भन्न सकिन्न, म यहाँ रहँदासम्म निष्कर्षमा पुगिन्छ भन्नेमा आशावादी छु।’

हत्याको मिसिलमै केही जटिलता देखिएकाले हत्यारा पत्ता लाग्न लामो समय लागेको उनको भनाइ छ।

रूपाको २०७१ भदौ १२ गते तीजको दरखाने दिन माइतबाट घर फर्किने क्रममा बानपा–३ बोक्से खाल्डोस्थित मध्यपहाडी लोकमार्गमा दिउँसै घाँटीमा धारिलो हतियार प्रयोग गरी हत्या गरिएको थियो। हत्याको प्रभावकारी अनुसन्धान र कारबाहीका लागि महिला अधिकारकर्मी, नागरिक अगुवाले लामो समयदेखि आवाज उठाउँदै आए पनि पछिल्लो समय घटना क्रमशः बिर्सदै गएको छ।

हत्या जे जसरी गर्‍यो दोषीलाई तत्कालै पत्ता लगाउन सकिन्थ्यो, दिउँसै गरेको हत्याको दोषी त्यतिबेला उम्कन आउने अवस्था कसरी सिर्जना भयो भन्ने नै हो, प्रहरी प्रमुखले सुरूको अनुसन्धानलाई दोषी देखाउँदै आएको पाइएको छ’, अधिकारकर्मी खड्काले भनिन्, ‘ढिलै भए पनि पीडितले न्याय पाउनुपर्दछ, अनुसन्धान जारी राख्न आवश्यक छ तर पछिल्लो समय तीज सकिएसँगै हत्याकाण्ड सेलाउने र पुनःअर्को तीजमा हत्याको विषय उठ्नु दुखद् हो।’

तीजको समयमा नारी माइत जानसमेत सोच्नुपर्ने अवस्थाको हत्याकाण्ड बाहिर नआएसम्म अन्त्य नहुने खड्काको भनाइ छ।


Last Updated on: September 3rd, 2022 at 12:13 pm
३८६ पटक हेरिएको

तपाईको प्रतिक्रिया